မိုးသားပြာပြာ ရပ်ဝန်းစွန်းဆီမှ.....

“ထိပ်ဆုံးသို့

တစ်တောင်ပေါ် တစ်တောင်ဆင့်၊
တောင်အမြင့် ပတ်ခြံရံ။

တစ်တောင်ဆုံး ပြန်တော့၊
တစ်လုံးပြန်ကျန် ပြန်ပေသမို့၊
အဖန်ဖန်လေ အားအင်နှိုးလို့ရယ်၊
ကြိုးလျှောက်ရပြန်။

တခါတလေ တကယ်ပန်းတာကြောင့်၊
တော်ပါပြီ ဆက်မလှမ်းချင်ဘု၊
ရပ်တန်းက ရပ်မယ်ကြံ၊
အမှန်တော့ ဖြစ်နိုင်မလား။

စခဲ့မိဟာပေါ့၊
တစ်နေ့မှာ ဆုံးရာရောက်ပါလိမ့်၊
အားလျှော့ကာ ဆုတ်ချင်စမ်းပါနဲ့၊
စိတ်နွမ်းအသာဖြေဦး၊
မာလာငွေ ကန်ရေအေးရယ်နှင့်၊
ငှက်တေးကို အာရုံဆင်လို့၊
မူတသွင် အားအင်သစ်လိုက်ပါ့၊
ချစ်ဖွယ့်လူသား . . .။ ။”

အမှန်ဆိုလျှင် ကျွန်တော်နှင့် လုံးဝမအပ်စပ်သော ငွေတာရီ ကဗျာလေးကို ရွတ်ညည်းနေမိသည်။တည်ငြိမ်သောရေပြင်ထက်တွင် ခံစားချက်ဗလာနှင့် ကဗျာ ရွတ်နေသော ကျွန်တော်သည် ခါးသီးသော ဘဝလျှောက်လဲချက်တွင် ထောင်ကျလျှက်ရှိသည်။ 

ရေပြင်ကျယ်ပေါ်တွင် လှေကြီးတစ်စင်းရှိသည်။ လှေကြီးပေါ်တွင် ကျွန်တော်တို့ လှေလုပ်သားများ ရှိနေသည်။ လှေလုပ်သားဖြစ်သူ ကျွန်တော်ကို ဒီလှေပိုင်ရှင် ပဲ့နင်း(လှေသူကြီး) ပိုင်သည်။ လူသားအချင်းချင်း ဘာကြောင့်ပိုင်သလဲလို့ မေးစရာရှိနေမည်။ အကြောင်းက ကျွန်တော် တို့ ဒီလှေပေါ်တွင် ရှိသမျှလုပ်သားအချို့တစ်ဝက် (သို့မဟုတ်) လှေလုပ်သား သုံးပုံ၊ နှစ်ပုံလောက်သည် ရောင်းစားခြင်းခံရသည်။ ပွဲစားမှ ကိုယ်ကျိုးမျက်နှာတစ်ကွက်သာကြည့်ပြီး ရောင်းချလိုက်သည့် ကျွန်တော်တို့မှာ ဟင်းရွက်ကန်စွန်း သာသာ ရောင်းကုန်တစ်ခုပင်။ 

ရေခြား မြေခြားတွင် လက်တလုံးခြား ခွစားနေသည့် လူအန္ဓပွဲစားသည် ငွေယူပြီးသည်နှင့် ကျွန်တော်တို့အား လှည့်ပင်မကြည့်၊ စွန့်ခွာသွားသည်။ ကျွန်တော်တို့ လူမျိုးခြားပဲ့နင်း၏ လက်အောက်တွင် လှေလိုက်ရင်း ကျေပြီးသော အကြွေးဆပ်နေသည်မှာ တစ်နှစ်ပြည့်ရန် 19 ရက်သာလိုတော့သည်။ ကမ်းမမြင် လမ်းမမြင် ဒီပင်လယ်ပြင်ကျယ်ကြီးတွင် နေထွက်မှ နေဝင် အချိန်များသည် ကျွန်တော့်လိုစောင့်နေသူအဖို့ ဝင်သက်ထွက်သက်မောလျစွာ အကြာကြီး စောင့်နေရသည်။ ကုန်လွန်သွားသော ရက်၊ လတို့အား လက်ချိုးရေရင်း လွတ်မြောက်နိုင်မည့်နေ့တစ်နေ့ကိုစောင့်နေသည်။

ငါးဖမ်းပိုက်ဆွဲရင်း အတွေးစတို့သည် ခါးသက်သည့် ဟောင်ဖွာဟောင်ဖွာနဲ့ကျယ်ကျယ်လောင်လောင်အသံကြောင့် ပြေးထွက်ကုန်သည်။ ဒီအသံသည် တစ်ရက်တွင် သုံးလေးခါလောက် ကြားနေရသော စိတ်ပျက်စရာ ပဲ့နင်းအသံပင်။ မူးလျှင် အပြစ်မရှိ အပြစ်ရှာပြီး ကျွန်တော်တို့ကို ပတ်ရိုက်တတ်သည်။ အခုလည်း မူးနေပြီ ထင်သည်။ ကျွန်တော် ထက်အသက်ငယ်သော လှေသားတစ်ယောက်အား ထိုးကြိတ်နေသည်။ သူ့ဆန်စားပြီး သူ့လှေစီးကာ အသက်ဆက်နေရသည့် ကျွန်တော်တို့မှာ မခံချင်သော်လည်း အောင့်ကာနေရသည်။ နေ့စဉ်ရက်ဆက် ငရဲခန်းထက် ပူဆာများသော ဒီလှေပေါ်မှ ပြေးထွက်သွားလိုက်ချင်သည်။ဆွဲလက်စ ငါးဖမ်းပိုက်အား အသိစိတ်ကင်းမဲ့စွာ ဇွတ်ဆွဲတင်နေမိတော့သည်။

                                        -----------------------------------------------------------------

ပြေးထွက်သွားသော ကျွန်တော့်စိတ်ကို လိုက်ဖမ်းရင်း မြင်ကွင်းတစ်ခုကိုရောက်သွားသည်။ ယိုင်နဲ့နဲ့ ပျဉ်အိမ်ကြီးရဲ့ ကပြင်ရှေ့ ကွပ်ပျစ်လေးပေါ်တွင် ကျွန်တော့်အမေနှင့်ညီမ ။ ထွက်ခွာသွားသော ကျွန်တော်အားလက်ပြနေသည်။ အဖေဆုံးပါးသွားပြီးနောက် တစ်ယောက်တည်း ကလေးနှစ်ယောက်နှင့် ရုန်းကန်လာခဲ့သည့် အမေသည် အရွယ်ထောက်လာသဖြင့် ကျန်းမာရေးချူချာလာသည်။ နေ့စဉ်ဆေးမြီးတိုနှင့် မှီဝဲနေသော်လည်း အနာနှင့်ဆေး မတည့်၍ထင်သည်။ တစ်စတစ်စ ပျက်ယွင်းလာသော အမေ့ကျန်းမာရေးသည် ငွေနှင့်လိုက်ကာ ကုရမည့်အခြေအနေမျိုးဖြစ်လာခဲ့သည်။

ကျွန်တော် တစ်နေ့ဆိုင်ကယ်တက္ကစီ ဆွဲခလေးနှင့် မလောက်မငှဖြစ်လာရာ ငွေကြေးပိုရသည့် တစ်ဖက်နိုင်ငံကို အလုပ်လုပ်ရန် သူငယ်ချင်းတစ်ယောက်၏ အသိ ပွဲစားအား ဆက်သွယ်မိသည်။ အလုပ်ရမည် မှာလုံးဝသေချာသည်ဟု အာမဘန္တေအကြိမ်ကြိမ်ခံနေသဖြင့် ယုံကြည်လာသည်။ လမ်းစရိတ်အလုံအလောက်မပါသောကျွန်တော်အဖို့ ဟိုရောက်မှအဆင်ပြေအောင်စီစဉ်ပေးမည် ဟုသောတစ်ခွန်းစကားကြောင့် ကျွန်တော်ယုံလိုက်မိသည်။

 အဆင်လည်းပြေခဲ့ပါသည်။ အမေတားသည့်ကြားက ကျွန်တော်ဇွတ်ထွက်လာမိသည်။ အမေကျန်းမာရေးကောင်းရန် အတွက် ယနေ့ခေတ်တွင် စရိတ်စက ကြီးမားလွန်းသော ဆေးဖိုးဝါးခများ လိုအပ်သည်။ လိုအပ်ချက်ကို ဖြည့်ဆည်းရန်မှာ ငွေသာရှိပါက အမေကို အကြာကြီး ပျော်ရွင်စေနိုင်မည်။ ငွေမရှိသော ဘဝတွင် တစ်နပ်စာ ကလေးနှင့် အသက်ဆက်နေရသည့် လက်ရှိအလုပ်ကို စွန့်လွတ်ပြီး တစ်ဖက်နိုင်ငံတွင် အလုပ်သွားလုပ်ပြီး ငွေရှာမည်။အမေ့၏ လက်ကျန် အသက်တစ်ချို့ ကို ကျွန်တော် သေမင်းလက်မှပြန်ယူမည် ဟုအားခဲထားသည်။ ပွဲစားထုတ်ချေးပေးသည့် ငွေတစ်သိန်းအား အမေ့နှင့်ညီမလေးအတွက် ကျွန်တော်၏နောက်ဆုံး ထမင်းလုတ်ဖြစ်မည်ဟု အိမ်မှမထွက်ခင်ကတည်းက ကျွန်တော်မသိခဲ့ပါ။

                                       -----------------------------------------------------------------

တရိပ်ရိပ်ပြေးလွှားနေသော ကားပေါ်တွင် ကျွန်တော့်ဆံစတို့ဖရိုဖရဲတိုးဝင်လာသောလေကြောင့် လွှင့်နေသည်။ မွေးရပ်မြေကို စွန်ခွာခဲ့သည်။ တစ်နေ့ပြန်လာမည်ဟု တေးမှတ်ထားလိုက်သည်။ နယ်စပ်မြို့သို့ရောက်လာသော ကားသည် အဝေးပြေးကားကွင်းတွင် ရပ်နားလိုက်ပြီးနောက် ပွဲစား၏ ကိုယ်စားလှယ်လာကြိုသော ဆိုင်ကယ်ပေါ်တွင်လိုက်သွားလိုက်သည်။ ဘာဆက်ဖြစ်မည်ကို ကြိုသိချင်သော်လည် သိခွင့်မရှိသည့် ကံတရားအတိုင်း မျက်စိစုံမှိတ်ကာ နေရာသစ်၊ဝန်းကျင်သစ်၊ လူအသစ်များနှင့် ခဏမျှ ထိတွေ့ကြည့်လိုက်တော့သည်။

ကျွန်တော်အား ပို့ဆောင်ပေးသည့် ခြံဝင်းသည်ကား အတော်အသင့်ကျယ်ဝန်း၏။ သီးခြားဖြစ်နေသောဝန်းကျင်တွင် အေးဆေးငြိမ်သက်သည်။ အိမ်သို့လှမ်းဝင်လိုက်သည်နှင့် ဘဝတူ နိုင်ငံခြားတရားမဝင်သွားရောက်မည့် လူဆယ်ဦးလောက်တွေ့လိုက်ရသည်။ ဝမ်းသာသွားသော စိတ်တို့နောက်တွင် အားအင်တစ်မျိုးကပ်ပါလာသည်ဟုထင်သည်။ အဖော်ရှိပြီ မဟုတ်ပါလား။ 

ပွဲစားကိုယ်စားလှယ်သည် မနက်ဖြန်နံနက်တွင်တစ်ဖက်နိုင်ငံကို ခိုးသွားမည့် အစီအစဉ်အား ပြောပြသည်။ ကျွန်တော်အားလုံး တစ်ဦးနှင့်တစ်ဦး မိတ်ဆွေဖွဲ့ပြီးနောက် စောစောပင်အိပ်ရာဝင်လိုက်သည်။ ခရီးပန်းပြီး နွမ်းနေသော ကိုယ်ခန္ဓာသည် တုံးခနဲ့ပစ်အိပ်သော်လည်း အသိစိတ်တို့က မရေရာသေးသော ရည်မှန်းချက်ဆီ၊ လွမ်းနေမိသော အမေ့အိမ်နှင့် ဇာတိမြို့လေး ခေါက်တုံခေါက်ပြန် ကူးလူးနေသည်။ ကူးလူးတွေးရသည်မှာ မောလာသည်နောက် အိပ်စက်ခြင်းတို့ အား ဇွတ်အတင်းဆွဲခေါ်လိုက်ရတော့သည်။

                                            --------------------------------------------------

စိတ်ပျက်စရာကောင်းလောက်အောင် လူလူချင်း ရောင်းစားသည့် ပွဲစားအား လွန်စွာရွံမိသည်။ ကျွန်တော်တို့အား နိုင်ငံခြားလူမျိုးတစ်ဦးရှေ့တွင် လက်ဝယ်ရောင်းချပြီးနောက် လောဘမီးများ တောက်လောင်ကာ ငွေများရေတွက်နေသည့် ပွဲစားသည် ထွက်ခွာသွားတော့သည်။ ကျွန်တော်တို့ဆယ်ဦးအား ထိုနိုင်ငံအခေါ် ထောင်ကယ်(သူဌေး) က အခန်းတစ်ခုတွင်ပိတ်လှောင်ထားသည်။ နေပင်မမြင်ရတော့ အခန်းကျဉ်းလေးတွင် ကျွန်တော်မျက်ရည်တို့တစ်စက်တစ်စက်နှင့် ယောက်ျားတန်မဲ့ ငိုနေမိသည်။

မကြာခင် လှေကြီးတစ်စင်းပေါ် ကျွန်တော်ရောက်လာခဲ့သည်။ ငါးကဲ့လှေဟုခေါ်သောလှေပေါ်တွင် ဘာလုပ်ရမည်ကိုမသိပေ။ တတွတ်တွတ်နှင့် မှာကြားနေသော ထောင်ကယ်သည် ဒီငါးကဲ့လှေ၏ ပဲ့နင်းအား ဘာပြောနေသည်ကို ကျွန်တော်မသိပေ။ သေချာသည်မှာကျွန်တော့်အကြောင်းပြောနေသည်ဟုထင်သည်။ သူတို့မျက်လုံးများ ကျွန်တော့်ထံတွင် ရောက်နေသည်မဟုတ်ပါလား။ ကျွန်တော် စိတ်ဓါတ်များကုန်ဆုံးနေသည်ဖြစ်ရာ ဖြစ်ချင်ရာဖြစ်စေ ဟု မျောလိုက်တော့သည်။

ရေပြင်ကျယ်ကြီးပေါ်တွင် ငါးကဲ့လှေသည် အလွန်ကြီးသော လှေကြီးတစ်စင်းဆီ တရွှေ့ရွှေ့ချဉ်းကပ်နေသည်။ ကျွန်တော်အား လှေကြီးပေါ်သို့တက်ရန် ငါးကဲ့လှေပဲ့နင်း ခြေဟန်လက်ဟန်ပြနေသည်။ လှေကြီးပေါ်ရောက်သည်နှင့် ငါးကဲ့လှေ ပြန်ထွက်ခွာသွားသည်။ တစ်ရက်ပြီး တစ်ရက် တက်မနှင့်မဟုတ် ၊ ခြေ လက်ဖြင့် သာ လှော်ခတ်နေသော ကျွန်တော်ဘဝလှေသည် ယက်ကန် ယက်ကန်နှင့် လှေကြီးပေါ်တွင် တစ်လပြီးတစ်လ ကုန်ဆုံးနေတော့သည်။ ကမ်းမကပ်ရသော ဒီလှေသည် တစ်နှစ်လုံး လုံးလည် ချာလည်နှင့် ငါးဖမ်း၊ ဖမ်းပြီးသားငါးများအား ကဲ့လှေဖြင့် လာကဲ့ယူသွားလိုက်နှင့် သံသရာလည်နေတော့သည်။

လကုန်ရက်တိုင်း လက်ချိုးရေပြီး လခသွားတောင်းတတ်သည်မှာ အမောပင်။ မသိသေးခင်က လခရမည်မှတ်သည်။ ကျွန်တော့်အား လာပို့သူက ဆယ်လခစာကြိုတင်ထုတ်ယူပြီး ရောင်းစားသွားသည်ဟု ကြားရသည်မှာ နှလုံးသွေးဆူပွက်မတတ် နာကြည်းခဲ့သည်။ ဆယ်လလောက်တော့ ကျွန်ခံရမည် ထင်သည်။ အထင်နှင့် အမြင်တို့ တက်တက်စင်အောင်လွဲခဲ့သည်။ ဆယ်လကျော်လည်း လခမရခဲ့ပါ။

ဆယ်လပြည့်၍ ဆယ့်တစ်လမြောက်တွင် လခသွားတောင်းမိသည့် ကျွန်တော်အား ထိုးကြိတ်လိုက်သည့် ပဲ့နင်းအား ကျွန်တော် နာကြည်းမိသည်။ လက်စားချေလိုသော်လည်း အဆုံးသတ်ထိ ခြိမ်းခြောက်မှုကား ကျွန်တော်နှလုံးသားတွင် သံမှိုကဲ့သို့နှက်ထားသည်။ အလဲလဲ အကွဲကွဲနဲ့ သွေးဆို့နေသော ကျွန်တော်ကို နားထင်အား သေနတ်ဖြင့် ထောက်ကာ ခြိမ်းခြောက်ခဲ့သည်။ ကျွန်တော် အသက်ရှင်လျှက် လွတ်မြောက်ချင်သည်။ သုံညဘဝမှ သုံည ၊ တိုးတက်မှုရပ်တန့်နေသော ကျွန်တော် ဘဝတက်လမ်းသည် အဆုံးမရှိရေပြင်တွင် စုန်စုန်မြုပ်တော့မည်လား မသိပါ။ 

ကြာလာတော့ လူသည်လည်း ထမင်းတစ်နပ်အတွက် ကျောပေါက်အောင် အလုပ်လုပ်နေသည်ဟု သာတွေးမိသည်။ လွမ်းလွန်းသည်။ အမေနှင့်ညီမလေး တို့ နေများပင်ကောင်းရဲ့လားဟု တွေးမိတိုင်း ရင်နာရသည်။ အမေအားဝေဒနာနိုပ်စက်ပြီး ရှိမှရှိသေးရဲ့လား ဟုတွေးမိတိုင်း မျက်ရည်များ ခန်းလုအောင် ငိုမိသည်။ ကိုယ့်ဘဝကိုယ် စိတ်နာသည်။ ခါးသက်တဲ့ ကံတရား နှင့်ကျွန်တော်သည် ကံဇာတ်ဆရာ ချပေးသည့်ဇာတ်ညွန်းတိုင်း လိုက်ကရဦးမည်လား။ ဇာတ်ညွန်းတွင် ကျွန်တော် ချမ်းသာမည့် အခန်းပါလျှင် ကြိတ်မှိတ်ကာ ဆက်ကလိုက်တော့မည်။ ကြိုသိခွင့်ရှိမည်လား။

                                                ---------------------------------------------------

တွေးတိုင်းခါးသည့် ကျွန်တော့ဘဝအကြောင်း မတွေးပဲနှင့်လည်း မနေနိုင်သောကြောင့် ခါးသက်သော ရှတတ ဒဏ်ရာကို ပြန်နွေးနေမိသည်။ စိတ်အစဉ် မကပ်သော အလုပ်လုပ်ခြင်း၌ ငါးဖမ်းပိုက် ဆွဲတင်နေသည် ကုန်သလောက်ပင်ဖြစ်သည်။ နောက်ဆုံးပိုက်တစ်ဖုံ ကိုဆွဲတင်ပြီးနောက် ငါးရွေးခြင်း၊ ငါးခြောက်လှန်းရန် ခွဲလိုခွဲ ဆားသိပ်လိုသိပ်လုပ်ရဦးမည်။ နေ့စဉ်ရက်ဆက် ငြီးငွေ့စွာ လုပ်နေရသည့် အလုပ်တွေပင်။

ငါးဗန်းသယ်ရန် ပြင်နေစဉ် တစ်ဝေါဝေါအသံများလာရာကို လှမ်းကြည့်လိုက်သည်။ အနောက်ဘက်တွင် တိမ်မည်းများစုနေသည်။ အနောက်တောင်လေသည် ကျွန်တော်တို့လှေရှိရာ ဘက်ကိုတိုက်ခတ်နေသည်။ သေချာသလောက်တွင် မကြာမီ မုန်တိုင်းဆင်တော့မည်။ အလုပ်များရပြန်သည်။ လိုအပ်သည့် ကိစ္စများကို ပျာပျာသလဲပြင်ဆင်ရသည်။ တရိပ်ရိပ့်ပြေးလာနေသော မုန်တိုင်းကို ပြေးမလွတ်နိုင်တော့သည်ဖြစ်ရာ ကျွန်တော်တို့လွတ်မြောက်အောင်ပင် ပြင်ဆင်ရတော့မည် ဖြစ်သည်။ 

“ဖြုန်း....ဗြုန်း.....ဝေါ.....”

မုန်တိုင်းအသံပေးခြင်းသည်ပင် ကြမ်းလှသည်။ လှိုင်းတစ်လုံး တစ်လုံးသည် ကျွန်တော်တို့လှေကြီးလောက် ကြီးမားလာသည်။ လှိုင်းကြီးလှေအောက်မှန်သော်လည်း အမြဲမမှန်တတ်သည့် လောက နိယာမအတိုင်း ဒီတစ်ခါတော့ လှေမြုပ်မည်မှာ ကျိန်းသေ၏။ ဇနက မင်းသားလှေမှောက်သည် မဟုတ်တိုင် လှေသားတို့သည် ယုံကြည်ရာ ကိုးကွယ်ရာ နတ် တို့ကို တိုင်တည်နေသည်။ ကျွန်တော်စိတ်တွင် ရတနာသုံးပါးနှင့် မိဘ၊ဆရာသာ နှလုံးသွင်းထားလိုက်သည်။ 

ကံတရားတို့သည် တစ်ခါတစ်လေတွင်မျက်လှည့်ဆန်သည်။ ကျွန်တော်လွတ်မြောက်ခြင်းကို မုန်တိုင်းအား ဓါးစာခံ လုပ်ရမည်။ ငါးထည့်သည် ဖော့ပုံးအဖုံးတစ်ခုကို ကိုယ်နှင့်မကွာဆောင်ထားလိုက်သည်။ အငြိုးနှင့် ချနေသည့် မုန်တိုင်းအပြင်ကို ကျွန်တော် ကျော်လွန်နိုင်မည်၊ မကျော်နိုင်မည်ကို ကံတရားနှင့် ကုလားဖန်ထိုးတော့မည်။ အမေဆီကို ဒီတစ်ခေါက် သားမိုက်အပြီးပြန်လာတော့မည်။ ညီမလေးတစ်ယောက်ကို လမ်းညွန်ဆုံးမမည့် အကိုကြီး ပြန်လာမည်။ရပ်ကွက်တွင်းသာရေးနာရေးတွင် ကူညီမည်။ ကျွန်တော်ပြန်လာခဲ့မည်။ 

နေ့တစ်နေ့၏ အဆုံးသတ်တွင် ကျွန်တော့် သေခြင်း ၊ရှင်ခြင်းလက်တစ်ကမ်းအလိုတွင်ရှိနေသည်။ မြင်မြင်သမျှ ရေသာ ပတ်လည်ရံနေသော ပတ်ဝန်းကျင်တွင် ကျွန်တော် ၏ မျှော်လင့်ချက်တစ်ပုံတစ်ပင်နှင့် အသက်ဆက်သွားရမည်။ ကျွန်တော်၏ နောက်ဆုံး နှလုံးထုံးသည်ကား သေလျှင် ရေတည်း၊ ရှင်လျှင် ရွှေထီးပင် ဖြစ်သည် မဟုတ်ပါလား ။

ချစ်ခင်လေးစားလျှက်

ပျူမခ(ကော့သောင်း)

3.4.2013(4.30 pm)